Xaflad balaadhan
oo lagu xusayo maalinta Biyaha aduunka
ayaa waxa qabtey shirkada Biyaha Boorama
ee Shaba...Mar-23-2008
Borama( Saylac.com) Xafladan oo ay ka
soo qayb galeen madaxda Gobolka, Oday
Dhaqameedyo, iyo waxgarad kaleba ayaa
maanta waxa ay lagu qabtey Huteelka
Caalamiga ah ee Rays Hotel. Xafladan oo
ay ka hadleen Pro. Suleyman Axmed oo ah
Gudoomiyaha Jaamacada Camuud, Sudlaan
Dhawal, Gudoomiyaha Gobolka Awdal
Maxamuud Sh. Cabdilahi, Maayarka degmada
Borama iyo masuuliyiin kale oo ka socday
shirkada Shaba ayaa waxa si isdaba jooga
looga wada hadlay ahmiyada ay biyuhu
uleeyihiin nolosha bani-aadamka iyo inay
haboon tahay in la tashiilo biyaha .
Waxa kale oo lagaga hadlay xaflada sidii
biyaha magaalada soo gaadha loo sii
horumarin lahaa xaga tahayada biyaha iyo
sidii ceelal kale oo kayd ah looga
samayn lahaa degaanada ku dhawdhaw
magaalada Boorama si hadii ay biyo
yareeyaan kuwa hadda la isticmaalaayi
loo adeegsan karo ceelasha cusub ee
kaydka loogu talo galay.
Xafladan ayaa waxa si gaara loogu
amaanay waxqabadka ay shirkadani ka
samaysey degmada Boorama iyadoo maanta
Boorama lagu tilmaamo magaalada ugu
horumarsan xaga helitaanka Biyaha oo ay
dadka ku dhaqan magaaladu u helaan habka
caalamiga ah ee Qasabada laga helo
biyaha.
Biyaha soo gaadha magaalada Boorama ayaa
waxa la sheegay inay yihiin kuwa
tayadoodu cafimaad u sareyso. Waxa kale
oo lagaga hadlay sidii loogaadhsiin
lahaa biyaha degaanada kale ee ku
dhawdhaw magaalada. shirkada shaba ayaa
waxa ku bahoobay ganacsato ree Boorama
ah oo iyagu iska xilsaaray sidii ay
maaliyadooda uga faa'idayn lahaayeen
dadka ku dhaqan magaalada oo biyo aad
ubadan isticmaala maalin walba.
Gagabagadii faladan ayaa waxa ka hadlay
Gudoomiyaha Gobolka Awdal wuxuuna ku
buuriyey inay dadaalkooda halkaa ka sii
wadaan shaqaalaha iyo masuuliyiinta
shirkada Shaba oo uu ku amaana inay
sameeyeen horumar xaga biyaha ah .
Waxa kale oo isna halkaa ka hadlay
Meeyarka Magaalada Boorama Cabdiraxman
Shide Bille oo sheegay inay sistamka ay
wadaan shirkada shaba uu yahay sistam
nidaam fiican ku dhisan ayna amaan mudan
yihiin waxaanan rabnaa inaad dadaalkiina
halkaa ka sii wadaan ayuu yidhi duqa
magaaladu.
Xafladan ayaa waxay kusoo beegantay
wakhti ay dadka magaaladu aad u hadal
hayaan in qiimaha biyaha oo aad u
sareeya ay shirkada biyaha ee Shaba
dhimi doonto waayo waxa soo dhaw
wakhtiga xagaaga oo ay inaga xigto sadex
bilood wax ka yar wakhtigaa oo dadweyne
aad u farabadani uu yimaado magaalada
boorama dadkaa oo ka yimaada wadanka
Jabuuti isticmaalka biyahuna ay saayidi
doonaan.
Dahir Axmed "jirde"
Saylac.com - Borama- Somaliland
