|
|
 |
|
|
Hargeysa: Boqolaal macalin
oo mudaharaad cabasho ah sameeyay
April-06-2008
“Lacag aanu bisha qaadan jiray iyo mid loogu
talagalay mudada imtixaanku socdo in lana siiyo
midna ma hayno” Mid ka mid ah Banaan-baxayaasha
“Imtixaankii imika ayay galeen, laba lacagayowna
ma jiraan waa lacagyar oo ay bisha qaadan jireen
tiina waa la siinayaa” Agaasimaha Wasaarada
waxbarashada
Hargeysa (Saylac.Com)- Boqolaal ka mid ah
Macalimiin wax ku barata Jaamacadaha kala duwan
ee Hargeysa, oo dhamaystay tababar u socday
muddo laba sannadood ah ayaa shalay banaan-bax
cabasho ah ka hor sameeyay, dugsiyadii loogu
talay galay inay ku galaan Imtixaanka shahaadiga
ah ee kama danbaysta ah oo ah Dugsiga sare ee 26
June, Maxamuud Axmed Cali, Qudhac dheer iyo
Gacmadheere ee Magaalada Hargeysa.
Macalimiintan banaanbaxay ayaa diidmadooda ku
sababeeyay musuq maasuq ay ku eedeeyeen in
Wasaarada waxbarashadu kaga sameeyay gunooyin
loogu talagalay muddada ay imtixaanka ku jiraan
iyo bas raac ay bishiinba hal mar qaadan jireen
oo dib u dhac ku yimi. Eedaas oo Masuuliyiinta
Wasaaradda Waxbarashaduna ay ku tilmaameen mid
aan waxba ka jirin. “Wasaaraddu waxay saxeexday
oo ay soo qaadatay, lacag dhan 7,000, oo Dollar,
oo Hay’ada Care international bixisay, oo loogu
tala galay Macalimiintu muddada ay imtixaanka ku
jiriraan in ay ku baxdo, taana Wasaaradda
waxbarashada ayaa doonaysa in ay iska qaadato,
tii aanu bisha soddonkeeda qaadan jirayna weli
ma hayno, sababta aanu imtixaanka u diidnayna
waa taa, galina mayno ilaa nala siiyo lacagta.”
Sidaa waxa yidhi mid ka mid ah Macalimiintii
isu-soo baxay. Waxay Macalimiintani sheegeen in
hadii ay imtixaanka galaan iyaga oo aan lacagta
la siin ay ka war-war qabaan in la waayi karo
lactooda marka imtixaanku dhamaado, “Waxaanu ka
war-warsanahay, hadii imtixaanka aanu galo, oo
uu dhamaado iyada oo aan lacag nala siin, in
goordhawna nala odhan doono waxba la idiinma
hayo. Markaa imtixaanka ka hor waa inaanu helaa
lacagtayadii, hadii kale goor-dhaw wax lagu
wada-hadlaa ma jiro.” Sidaa waxa ku dooday mid
ka mid ahaa Macalimiinta qaadacay in ay galaan
imtixaanka.
Dhinaca kale, Agaasimaha guud ee Wasaaradda
Waxbarashada Cali Cabdi Odawaa, Guddoomiyaha
waxbarashada Gobolka Hargeysa Cali Cabdi Jiciir
iyo hawl-wadeeno kale oo Wasaaradda ka tirsan oo
tagay goobaha macalimiintu ka sameeyeen
cabashooyinka ee loo asteeyay in ay Macalimiintu
imtixaanka ku galaan, ayaa dejiyay arrintaasi,
islamarkaana ku qanciyay macalimiinta inay
galaan Imtixaanka.. “Gala Fasaladda haddii kale
lacag aad nagu leedihiin oo aad helaysaan ma
jirto, lacagtiinii hadda ayaanu idin siinaynaa
ee fadhiista fasalada aan wada-hadalnee.”
Weedhahaas iyo kuwo kale-ba waxay ka mid
ahaayeen Erayayadii dejinta ahaa ee ay
Masuuliyiinta waxbarashadu ugu baaqayeen
Macalimiinta banaan-baxayay.
Agaasimaha waxbarashada oo wax laga weydiiyay
sababta kicisay macalimiinta ee ay imtixaanka u
diideen ayaa waxa uu yidhi. “Maanta (shalay)
sida aad la socotaan dalka oo dhan waxa ka
bilaabmay Imtixaankii Macalimiinta, kuwaas oo
tababar laba sanno ah oo u socday dhamaysatay,
oo tiradoodu dhan tahay 1939 (kun sagaal boqol
iyo sagaal iyo sodon) macalin. waxa rag ah 1522
macalin, waxaana dumar ah 417, shahaadada ay
qaadanayaana waa dublooma, luuqadaha ay ku
galayaana waa saddex luuqadood, oo kala ah
Carabi, Ingiriisi iyo Soomaali, waana isku
leefal ah oo nin waliba tuu isleeyahay waad ku
baasaysaa ayuu ku galayaa. Markaa waqti ayuu
lahaa Imtixaanku, waqtigiina waa imika. Sidaa
daraadeed Macalimiintii imika dibada ka
buuqaysay ha u qaadanina in ay Imtixaanka
diidayaan, dhanxiir ayaa meel walba jooga,
waxoogaa yar oo lacag ah ayaa naga maqan ayay
lahaayeen, lacagtiina kama maqna ee lacagtoodu
waa diyaar. Laakiin, dhan-xiir ayaa odhanaya
ilaa la ina siiyo 19-ka Doolar yaynaan galin
Imtixaanka, taasna inay macalimiintu dhagta u
dhigaan maaha, imakana waad arkaysaan oo
fasaladii ayaa lagu jiraa, Imtixaankiina hada
ayuu dalka ka wada bilaabmay.”
Mar la waydiiyay Agaasimaha, sababta keentay
cabashadan macalilmiinta, oo marar badana soo
noq-noqotay iyo sababta lacagtooda dib u riday,
waxa uu ku jawaabay, “Lacagta waxa naga caawiya
Hay’adaha Care iyo Save the Children, markaa
foojarku wuu yar daahi karaa, waxa dib u dhaca
keenayna waa daahidaa ee wax kale ma jiraan.”
Agaasimuhu, mar uu ka jawaabayay su’aal ahayd in
Macalimiinta laga musuqay lacag loogu talagalay
muddada imtixaanku socdo, waxa uu yidhi,
“Imtixaankii imika ayay galeen, haday galeena
waa la siinayaa lacagtoodii, laba lacagayawna
maahee waa mid, taasina waa u diyaar oo waa tii
ay bisha qaadan jireen uun.” Ayuu yidhi
Agaasimaha guud ee Wasaaradda Waxbarashadu, Mr.
Odawaa.
By Cabdiqani X. Baynax. Hargeysa Somaliland
|
- To Submit Information
Click
here--
|
|
