|
|
 |
|
|
Dhega
adayga Xisbiga kulmiye maxaa keena?
April, 08,2008
Kuwait(Saylac.com) Nin ayaa dhakhtarka u tagay
isagoo raba inuu waxka weydiiyo siduu dawo ugu heli
lahaa xaaskiisa oo dhego adag ama aan horey u maqal
hadalada uu weydiiyo inay uga jawaabto. Ninkii
dhakhtarka ahaa ayaa siiyey talo dhaxal gal u
noqotey ninkii xaaska dhegaha adag qabay talada uu
siiyeyna waxay ahayd:
Marka hore 40 afartan talaabo u gaadh kuna dheh
iyadoo madbakha ku jirta , Naa Heblaayooy maxaad
caawa casho inoo karinaysaa, haday ku maqli weydo ku
durug ilaa sodon talaabo u gaadh hadana ku celi
hadalkii oo dhex; Naa heblaayo caawa muxuu reerku ku
cashaynayaa ... Haday ku maqli weydo hadana kusii
dhawaw oo u gaadh ilaa 20 talaabo kuna celi ilaa aad
agteeda u dhawaatid.. Ninkii ayaa sidii yeelay oo ku
celceliyey dhawr jeer isagoo kusoo marba ku sii
dhawaanaya wax jawaabna kamuusan helin markaasuu
markii ugu danbeysey intuu dhabarkeeda istaagay ku
yidhi naa heblaayo waxan ku weydiiyey caawa maxaad
inoo karinaysaa oo casho ah? intey qosashay ayey
tidhi marka hore intaad shan jeer hadalka ku
celcelinaysey adigoo halkaa dheer jooga maxaa kuu
diiday inaad agtayda timaadid...
Hadaba murtida ka danbaysa sheekadani waxay tahay in
inta badan dhibaatada aan dadka kale ku sheegno ay
inaga laf ahaanteena ay ka dhalato, ninkani isaga
ayaa dhibaatada canaaga naagtiisa sababteeda lahaa
waayo waligii agteeda muu inam inuu meel dheer waxka
waydiiyo mooyee.
Hadaba biyo dhaca sheekadan ayaan maanta ku
qaadadhigayaa isfaham la'aanta dhex taala labada
xisbi ee UDUB iyo Kulmiye oo aad moodo inay yihiin
sida labadaa qof oo isfahmi weydey.. Dadka
badankiisa ayaa waxay isweydiinayaan maxaa labadan
xisbi loogu soo qaatey naag iyo ninkii qabay ?
Murtida ka danbeysaayi sidaa maaha labada qof ee
isqaba ka ragga ah iyo ta dumarka ah anigu ma arko
wax ay isdheeryihiin inkastoo dhaqanka soomaalidu ay
badanaa xagga raga ahmiyada saaraan hadana bulashadu
waxay ka dhisantaa hooyo waana sababta loo yidhaa (Dhulkii
hooyo , Afkii hooyo.)
Hadaba anigoon islahayn labadan xisbi mid si gaara u
canaano hadana eedu waxay madax u saaran tahay
xisbiga talada haya oo inta badan iska indho tira
cabashooyinka ay xisbiyada mucaaradka ahi sheegtaan
sida arintan ugu danbaysey ee ah wakhtiga
madaxweynaha loo kordhinayo halaga wada hadlo si
midana qaraar halooga soo saaro ee yaan cidna la
yaraysan.
Dhinaca kale Xisbiga Mucaaradka ee Kulmiye waxa la
gudboon inuu Dastuurka Dalka u dajisan aad ugu
noqnoqdo tixna galiyo qodobada ku cad dastuurka
Jamuuriyda Somaliland u yaala. Hadalada
warsaxaafadeedka ah ee la iska daba qaato ee midba
midka kale ku burinayo warkiisu waxay abuuri karaan
isfaham la'aanta iyo dhego adayga oo sii siyaada
waxana wanaagsan in wada hadal iyo kulamo joogta ah
laga sameeyo arimahaas intayna saxaafada usoo bixin.
Intaa waxan raacin lahaa, Waayadan danbe waxaad
moodaa inuu madaxa lasoo yara kacay xisbiga kulmiye
ka dib markii uu ku guulaystey inuu ushirweynihii
labaad si nabada ku gabagabeeyey , lakiin taas
ayaanu u arkin Hogaamiyaha xisbiga kulmiye Axmed
Maxamed Maxamuud Siilaayo inay ka dhigan tahay in
muftaaxii Madaxtooyada jeebka loogu riday waxaanan
sidaas u leehay ka dhib markii uu dhawaan
Gudoomiyuhu uu Madaxweynaha Dalka Mudane Dahir
Rayale Kahin ugu hanjabay inuu furaha qasriga
madaxtooyada iska soo wareejiyo mar hadii
wakhtigiisii ka dhamaaday ! Arintan ayaa fajiciso
iyo amakaag ku noqotey Bulsho weynta Reer
Soomaalialnd meel kasta oo ay joogto, dadka
badankiisuna waxa uu u fasishay inuu Gudoomiye
Siilaanyo u jeedo inuu gacmaha dib u shaadhka uga
laabtey feedhna diyaar u yahay.
Intaa waxa dheer in maanta ay labada Gudoomiye ee
xisbiyada Mucaaradku ay si wadajira ah u wadeen
wadahadalo ay la lahaayeen Shirgudoonka G/Guurtida
si ay ugala hadlaan wakhti kordhinta madaxweynaha oo
wakhtigiisu ku egyahay bishan 15 keeda.
isbaahaysigan ayaad moodaa labada xisbig mucaarad
inay meel ka wada jeedaan waxabay u egtahay
inay labadan xisbi kaliya ku midoobeen
si muruqooda ay kula dagaalamayaan dawlada
soomaaliland uu tamar mida u noqdo , LAKIIN
akhristoow bal dib u fiirso waayaha!! Sanadadii
sagaashanaadkii waxa jiray xisbiyo mucaarad ah oo is
baahaysta si Madaxweynihii Dalka Soomaaliya xukumi
jiray ee Maxamed Siyad Barre looga tuuro talada
wadanka, Xisbiyadaasi midna muusan lahayn qorshe
siyaasadeed oo uu meel uyaala kadib marka siyaad
Bare ka tago wadanka uu ku talagalay markuu siyaad
carareyna wixii dhacay waaba loo wada joogay.
Hadaba inay midoobaan labadan xisbi mucaarad ee
KULMIYE iyo UCID ma xuma (LAKIIN WEYN) ayaase
meesha taala oo ah : Mar haduu maanta Gudoomiyaha
Xisbiga Kulmiye uu sidan u hadlayo dastuurkii
wadankana dhegaha ka furaystey maxaad fili doontaa
marka uu wadanka taladiisa qabto.. (Waa oday ka
sheekeeye intaanu shaadhku igu guban miyaan shiinaba
aado) Jamuuriyada Soomaaliland oo dhalinyarta ku
nooli 87% ay yihiin kuwa shaqo la oo aan wax camala
hayn marka loo geeyo xiisad dagaal oo ka alooganta
waxaan shiki ku jirin inay labadaas marka la isku
daro ay inagaga filan yihiin inaynaan u baahnayn
Gaas iyo Kabriid kale oo aan u doonano dibadaha si
aan u qabadsiino Jamuuriyada Soomaaliland ee mudada
dheer nabad ku caano maalaysey.
Ilaahay ayaan taa ka magan galay waxaase la yidhi
nimaan waxa soo socda garan waxa jooga ma garto,
Habaarkana waxaad muudaa inay hadalada Gudoomiyaha
xisbiga kulmiye iyo raga mayalka adag ee xisbigiisa
ay ku wada jiraani uu si xawliya u soo dedejinayo
isla markaana uu Madaxweynaha Jamuuriyada
Soomaaliland Dahir Rayale Kaahin uu shaabad weyn oo
OK ay saarayo si arintani usoo degdegto.
Shacabka maxaa la gudboon?
Waxa dhamaanteen inala gudboon inaan ku waaya
qaadano koonfurta soomaaliya qaska ka taagani siduu
ku bilawday ilaa hadana kusocdo .. waana inaanu
khaladkasta oo uu hogaamiye, Ama Madaxweyne uu ku
kaco aanaan ku taageerin oo danta dadka laga raaco
qofkastoo Jamauuriyada Soomaaliland u dhashay waxa
la gudboon inuu dhegaha ka furaysto cidkasta oo
qalalaase abuuri rabta iyo wixii dastuurka ka baxsan
waa in cidii keenta lagu celiyaa ama laga wada
hadlaa sidii dastuurka loo bedeli lahaa .
Madaxweynaha Jamuuriyada Somaliland isaga waxaan
leehay hadalka ku celceli Axsaabta mucaaradka ah
ilaa aad u dhawaanaysid dhegtana waxa ugu sheegaysid
hadii kale adigana waa kuu casho la'aan. kkkkkkk
Ismahan Nuur
Saylac.com
Kuwait, Kuwait City
ismahannuur@yahoo.com
hadii aad hayso faalo ku saabsan qormadan kusoo
hagaaji emailka ah saylacnews@yahoo.com ama emailka
wariyaha midkood.
|
|
|
