|
|
 |
|
| |
War Deg- Deg ah: Mudaharaad
sababay dhimasho iyo dhaawac oo ka dhacay Hargeysa
..April,27,2008
Hargeysa(Saylac.com)-Mudaharaad cabasho ah oo
sababay dhimasho iyo dhaawaca inta la hubo saddex
ruux ayaa maanta ka dhacay waaxda Axmed Dhagax ee
magaalada Hargeysa. Kooxo dadwayne ah oo ka mid ah
dadka ku dhaqan degmada Axmed Dhagax ee magaalada
Hargeysa, ayaa maanta mudaharaad balaadhan isugu soo
baxay, kaasoo ay kaga soo horjeedaan magacyada mid
ka mid ah sadex degmo oo golaha deegaanku ay
todobaadkii hore magacaabeen.
Mudaharaadkan oo ka bilaabmay subaxnimdii Garoonka
kubada cagta ee Hargeysa Stadium, ayaa waxa uu ku
soo dhawaaday duhurkii saldhiga dhexe ee Caasimada
Hargeysa, Islamarkaana rasaas ay kor u ridayeen
ciidamada Boliska oo isku dayayay inay dadka kala
dareeriyaan ayaa sababtay inta la hubo dhimshada Hal
qof iyo dhawaaca laba ruux oo shacab ah, kuwaasoo la
geeyay Cusbitaalka Guud ee magaalada Hargeysa.
Sidoo kale dhawr Askari oo ay dadweynaha Cadhaysani
dhagaxyada ay tuurayeen dhaawacyo gaadhsiiyeen,
kuwaasoo aanu ku booqanay Cusbitaalka.
Wasiirka Arimaha Gudaha ayaa Qoraal uu soo saaray oo
imika 12-kii duhur-nimo waxa uu ku sheegay in
dawladu ka noqotay magacaabista degmada cusub ee Sh.
Cumar Yuusuf, oo laga jaray degmada Axmed Dhagax.
Iyo in degmo kasta loo daynayo magaceedii hore.
Taasoo imika u muuqta inay xaalada Dejisay.
Xildhibaano iyo Salaadiin ayaa arrintan dejinteeda
ka howlgalayay.
“Kama soo hor jeedno degmada la magacaabay, balse
waxaanu ka soo horjeednaa oo aan la aqbali Karin in
xaafadaasi magacii hor ee loo bixiyay laga bedelay,
loona bixiyay magac cusub, xaafada markii hore waxa
la odhan jiray Cabdi Iidaan, imika markii degmo laga
dhigay maxaa loogu bixiyay nin kale, waa taas
waxaanu diidan nahay”Sidaa wax yidhi mid ka mid ah
dhalinyaradii horkacaysay banana baxaasi oo ii
sababeeyay ujeedada mudaharaadkooda.
“Lama yeeli karo lana aqbali mayo in Degmada Axmed
Dhagax la kala jaro, hadana loo bixiyo magac la
doonayo in lagu xamaasadeeyo dadweynaha ku dhaqan
degmada Axmed dhagax.”ayuu intaasi raaciyay
wiilkaasi.
Banaan- baxaasi ayaa lagu dhagax tuurayay baabuurta
dawlada, waxana muraayadaha daaqadaha laga jajabiyay
Baabuurka Hoggaanka Hawl gelinta Booliska , halka
Baabuur kale oo uu leeyahay Wasiirul dawlaha
macdanta iyo biyahana la shiiday, inkasta oo aan
khasaare weyn loo geysan.
Mudaharaadeyaashaasi waxa kale oo ay taayiro ku
shideen wadooyinka degmada Axmed dhagax qaarkood,
iyagoo markii dambena shiiday Dhismaha golaha
deegaanka Hargeysa, oo xiligaasi uu ku sugnaa
Maayarka Caasimada Hargeysa, Eng Xuseen Maxamuud
Jiciir,in kasta oo markii dambe boolisku xabado ay
kor u ridayeen ay ku kala kaxeeyeen.
Ilaa imika ma jiro wax khasaare ah, iyadoo aan warar
la xaqiijini ay sheegayeen in laba qof wax ku
noqdeen xabadihii boolisku rideen.
Waxa kale oo la ii sheegay in Askari boolis ah ay
kox dhalinyaro ahi kala boodeen qorigii.
Ugu dambayntii Qoraal aanu helay oo uu ku saxeexan
yahay Wasiirka Arrimaha Gudaha, Md. Cabdilaahi
Ismaaciil Cali (Cirro) ayaa muhiimadda nuxurkiisu
xambaarsanaa ka noqosho ay xukuumadu ku war-gelinayso
inay ka noqotay degmooyinkaas dawlada hoose
magacawday, oo ay ku daynayso sidii ay hore ahaayeen.
Taasoo ay mudaharaadayaashu markii loo qaybiyay
koobiyadeeda, loona akhriyay ay ku qanceen, kuna
kala dareereen iyaga oo sacabada tumaya.
Musiliyiintii ku hawlana dejinta xaaladaas, waxa ka
mid ahaa Wasiirka Caafimaadka, Md. Cabdi Haybe,
Xildhibaan Maxamed Diiriye (Nacnac) oo ka soo wada
jeeda beesha deegaanka Mudaharaaday, iyo waliba
Suldaan Maxamed Cabdiqaadir, Suldaanka guud ee
Beelaha Isaaq.
Cabdiqani X. Baynax, /Saylac.com/Hargeysa Somaliland
|
|
|
