Baydhabo:- Waxaa maanta 4: 30 (afartii iyo barkii galabnimo oo gaw ah) wakhtiga Baydhabo ka soo degay gegida dayuuradaha ee magaalada Baydhabo wefdi heer qaran ah oo ay horkacayaan madaxwayne Cabdulaahi Yuusuf iyo Ra'isal Wasaare Cali Maxamed Geedi uuna ka mid yahay Ra'isal Wasaare ku xigeenka ahna Wasiirka Maaliyadda  Professor Saalim Caliyow Ibroow, Wasiirka Dastuurka Dawlada Federaalka Dr Cabdalla Deerow Isaaq iyo xubno kale oo isuga jira Wasiiro iyo Wasiiro ku xigeeno.

Markii madaxwaynaha iyo wefdigiisa ay cagta soo saareen ciida Baydhabo ayaa waxaa ay salaan sharaf ka qaateen cutubyo isku dhafan oo ka kala socday Qaybta 60-aad ee Ciiidanka Xooga Dalka Soomaaliya intii ku hartay Baydhabo ka dib colaada sokeeye iyo Ciidanka Booliiska magaalada Baydhabo iyo kooxda Baandeyda oo garaacayay muusikada heesta astaanta calanka Soomaaliya ee "Soomaaliyeey Toosoo, Toosoo Isku Tiirsadeey, Hadba kiina taag daranee, Taageera weligiinee..."

Salaan sharafta iyo calan saarka ka dib waxaa madaxwaynaha iyo Ra'isal Wasaaraha qoorta loo suray ubax.

Waaxaa iyaguna wefdiga heeso ku soo dhaweeyay kooxaha xagga fanka ee ka jira magaalada Baydhabo sida fanaaniinta kooxda Aralaadi Band.

Waxaa dhoobnaa hareeraha dhabbaha ay ku soo degeen dayuuradiihi siday wefdiga shacab iyo mas'uuliyiin aad u tiro badan oo si is maqiiq ah salaanta ugu boobayay wefdiga madaxwaynaha iyo Ra'isal Wasaaraha. Madaxwayanaha iyo Rai'sal Wasaaraha ayaa salaan saf ah oo mid mid ah la maray dhamaan shacabkii iyo madaxdii u tuurnaa soo dhawayntooda dhabbaha dayuuradaha ee garoonka Baydhabo.

Soo dhawaynta oo ahayd mid aad u diiran oo aan ereyo lagu cabiri karin ahaydna mid aan loo kala harin shacab iyo madaxba ayaa waxaa ka mid ahaa masúuliyiinta ku soo dhawaysay wefdiga magaalada Baydhabo dhamaan wasiirada iyo xildhibaanada ka tirsan dawladda federaalka ee ayagu horay ugu sugnaa Baydhabo oo kala ah Wasiirka Gaadidka Cirka iyo Dhulka Ibraahim Aadan Xasan "Kiishbur", Fowsiya Maxamed Sheekh-wasiirka arimaha  Haweenka iyo Qoyska, wasiirka Hidaha iyo Tacliinta Xuseen Maxamuud Sh.Xuseen, Wasiirka dib u heshiisiinta Sheekh Aadan Sheekh Madeer iyo xubno kale oo ay ka mid yihiin Ibraahim Xuseen Saalax, Cabdulkaahi Cabdi Garuun iyo Ibraahim Isaaq Maxamed, Wasiirka Cadalada Sheekh Aadan Maxamed Nuur "Seekh Aadan Madoobe" ,Xasan Maxamed Nuur "Shaatigaduud", wasiirka Beeraha ee dawlada federaalka ah, Xildhibaan Maxamed Ibraahim "Xaabsade",  Wasiir ku xigeenka Macdanta iyo Biyaha Axmed Sheekh Maxamed Cabdi Amatow , Xildhibaan Madoobe Nuunow, xildhibaan Maxamed Mursal Boorow , Xildhibaan Cali Aadan Xuseen , Maxed Nuur Maxamed Khayre,  iyo Aadan Maxamed Nuur "Aadaan Saransoor" iyo masúuliyiinta maamulka ku meelgaarka ah ee ka rimaya Baydhabo oo ay ka mid yhiin Mayow Teesiyow, Maxamed Cali Aadan "Qalinle" iyo Cabinuur Boodadheere. Waxaa kaloo soo dhawaynta wefdiga madaxwaynaha iyo Ra'isal wasaaraha ka qayb qaatay Maxamuud Sayid Aadan-Wasiirka Hantida Qaranka iyo Qalabaynta oo xalay ku soo biiray wasiiradii dawlada ee horay Baydhabo u joogay asagoo safar xagg dhulka ah kaga yimid gobolka Gedo

Is marxabayn iyo salaan ka dib ayaa waxaa wefdiga  ka soo gelbiyay gegida dayuuradaha magaalada Baydhabo kolonyo baabuur ah oo isugu jirtay baaburta gaarka ah oo marti sharafta loogu talagalay iyo kuwa dagaalka ee loo yaqaano tiknikada oo sugayay amaanka wefdiga.

Laga soo bilaabo cirifka gegida dayuuradaha ee magaalada ilaa guryaha martida ee wefdiga la dejiyay, ilaa garoonka kubadda cagta ee Ayuub Sheekh Yarow ayaa waxaa hareeraha wadooyinka tubnaa dadwayne buux dhaafiyay magaalada oo isugu jiray dadka degan magaalad iyo kuwo ka yimid deegaanada kale oo ayagu u yiimd in ay goob joog u ahaadaan booqashadan heerka qaran ah, waxayna lulalayeen calanka astaanta qaranka Sooomaaliya, ubaxyo iyo laamu quuyan.

Wefdiga madaxwayne Cabdulaahi Yuusuf iyo Ra'isal Wasaare Cali Maxamed Geedi oo aad u daalana ayagoo safar dheer oo  xagga cirka iyo dhukaba ah ku soo maray gobollo kale ayaa haddana u khudbadeeynaya dadwaynaha magaalada Baydhabo oo goob fagaare ah isugu soo baxay.

Fiiro Gaar ah: Muuqaalada iyo sawirrada soo dhawaynta wefdiga dib ayaan ka soo daabacaynaa

Bashiir Maxamed Aadan "Bashiir Xabashow"

Baydhabo

Baidoa.com