Garoowe (AllPuntland)- Madaxwaynaha dawlad goboleedka Puntland Mud; Maxamuud Muuse Xirsi (Cadde) ayaa soo gabogabeeyay hawlihii uu maalmahan u joogay magaalada Gaalkacyo kadib markii uu magacaabay guddi reer Puntland ah oo ka qaybqaata nabad raadinta laga dhex wado beelaha Sacad  iyo Saleebaan.

Guddigan ayaa waxaa xubno ka ah masuuliyiin ay kamidyihiin;- Cismaan Xaaji Nuur iyo Daahir Maxamed Garaase oo ka kala yimid gobollada Bari iyo Nugaal kuwaasoo saxaafadda u sheegay inay xataa diyaar u yihiin inay tagaan goobihii ay dagaalladu ka dheceen oo ay gacmaha isu soo saaraan beelaha dagaalamay .

Madaxwayne Cadde ayaa intii uu joogay magaalada Gaalkacyo wuxuu shirar la qaadanayay odayaasha beelaha dagaalamay qaarkood , kulamadaasi oo ka dhacayay Hotel Taar ayaa looga wada hadlayay qaabka ugu sahlan ee lagu heshiisiin karo labada beelood.

Madaxwaynuhu wuxuu kulankan la qaatay odayaal miisaan ku leh labada beelood oo uu kala xaajoonayay in dib danbe aysan u dhicin dagaaladu.

Madaxwaynaha ayaa sheegay in guddigan uu magacaabay inuu la shaqayn doono guddi hore uu u magacaabay Ras'iisal wasaaraha dawlada Federaalka Soomaaliya Cali Maxamed Geedi.

Dhinaca kale madaxwaynaha Puntland ayaa intii uu kusugnaa magaalada Gaalkacyo wuxuu kulamo layeeshay maamulka gobolka iyo midka degmada oo ay kawada hadleen in wax laga qabto bilicda magaalada oo haatan uu ka muuqdo is dhex yaac dhinaca dhismaha ah.

Madaxwaynuhu wuxuu amar ku bixiyay muddo 10 casho ah lagu banneeyo Warshadda Gallayda oo waqti hore ay dawladda Punltnand nadiifisay uguna tala gashay in dadku ku ganacsadaan hase ahaatee dadku ay kasoo guureen.

CCC Farayaamo.