London:- ka dib markii in mudo ah laga wada hadlayey wax ka qabadka garoon diyaaradeed oo uu yeesho gobalka Nugaal, ayaa ugu danbeytii waxaa dadka gudaha ku nool oo aan u kala harin ay gacanta saareen dhulkii loo qoondeeyey in laga dhigo halka ay diyaaraduhu ka haadaan soona caga dhigtaan, markiiba waxa ay ka soo hooyeen guul la taaban karo iyaga oo u dhan dhinacyada bulshada iyo maamulkuba.

Hadaba iyada oo laga duulayo arintaas ayaa waxaa la soo gaarsiiyey jaaliyadaha dibada in ay ka soo qeyb galaan howsha samo-falka iyo waxqabadka isugu jirta ee ay bilaabeen dadka guduhu, waxayna jaliyada gobalka Nugaal ee U.K ay bilowdey in ay ka qaadato doorka kaga aadan wax qabadka garoonka, ayna ka jawaabto codsiga gudaha ee ay amaantiisa leeyihiin dhamaan dadka deegaanka oo muujiyey isku duubnaan, kalsooni, iyo wax qabad dhab ah kaas oo ay qeyb ka qaateen maamulka puntland.

Waxaayna markii ugu horeysey jaaliyadu gaarsiisey gudiga lacag ururinta gobolka Nugaal lacag dhan 10.000$ si loogu biiriyo howlaha garoonka taas oo ku timid go,aan wada jir ah oo ay qaateen jahliyada gobolku.

"Waxaanu aad u soo dhaweyneynaa wada shaqeynta gudaha iyo xog is dhaafsiga si loo daboolo baahida joogtada ah ee gobolka waxaanuna jeclaan lahayn in aanu hello meesha wax marayaan mar kasta" sidaa waxaa yiri mid ka mida dadka reer Nugaaled oo diiday in magaciisa la shaaciyo.

Waxaan iyana amaan mudan abaabulka dadka gudaha kuwaas oo muujiyey sida ay uga go-antahay sidii ay iskood wax ugu qabsan lahaayeen, waxaana taasi dhiiri gelin siisay dadka dibada oo iyaga laftoodu ku dhiiraday sidii arinta ay qayb uga qaadan lahaayeen.

A/Rizak Yassin Caanogeel.
Puntlandpost, Lodon,