Seattle(Saylac.com)- Jaaliyada reer AWdal ee ku dhaqan magaalada Seattle ee Cariga maraykanka ayaa maanta yeeshay kulan balaadhan oo ay kaga wada tashadeen sidii dardar loo galin lahaa waxqabadka iyo mashaariicda horumarineed ee gobolada Awdal iyo Salal. Kulankan oo ay ka soo qayb galeen dhamaan xubnaha qoysaska degan magaalada Seattle oo ay weheliyaan  nuucyada bulshadu ka kooban tahay sida Dhalaanka, Haweenka, Oday dhaqameedyo, Aqoonyahano, Culimaa udiin iyo waxgarad kale oo farabadan ayaa waxa laga soo jeediyey hadalo muujinaya ahmiyada ay isku tiirsanaanta iyo waxwada qabsigu ku leeyihiin bulshdada dhexdeeda.
Aqoonyahanada Jaaliyada oo iyagu kulankan ka soo jeediyey hoga tusaalayn aad u xiiso galisey bulsho weyntii kulanka kasoo qayb gashay ayaa waxay tilmaameen in isku xidhnaanta iyo waxwada qabsiga la xoojiyo si qurba jooga reer Awdal iyo Salal ee degan Seattle uu hormood una noqon lahaa mashaariicda horumarineed ee ka socota ama laga fulin doono dhulkii hooyo.

Kulankan maanta ayaa waxa lagu ururiyey lacag dhan $11,800  kaw iyo toban kun iyo sideed boqol oo doolarka maraykanka ah oo lagu caawiyey Macadka Diiniga ah ee magaciisa la yidhaa Mahad Al Islami Saylaci ee dhawaan laga furay magaalada Borama. Sidoo kale waxa Jaaliyadu ay balan qaaday inay siweyn uga qayb qaadan doonaan dhawaan mashruuca garoonka oo uu hada ururka Gurmad hawlihiisa ku gudo jiro.  Maxamuud Cabdilahi (Qaame) oo ka mida aqoonyahanadii munaasibada ka hadlay oo ku hadlay magaca ururka ARDAA ayaa tibaaxay ahmiyada midnimadu leedahay isagoo hadalkiisa sii watana waxa uu ku dheeraaday inuu diyaar u yahay ururka ARDAA sidii dardar ay u galin lahaayeen ka qayb qaadashada mashaariicda horumarineed ee gobolka Awdal.
Sidoo kale Maxamuud Cabdilahi Rooble oo isaguna ku hadlayey magaca ururka Gurmad ee hawsha ka wada garoonka Xasan sheekh Muunin ee degmada Borama ayaa isaguna bulsho weyntii reer Awal iyo Salal ee kulankan iskugu timi soo hordhigay hawsha uu ururka Gurmad ku gudo jiro ee dhinaca garoonka. Maxamuud Cabdilahi Rooble ayaa waxa uu sheegay inay dhawaan ururka Gurmad hawlgalkooda ay bilaabeen wajigii ugu horeeyey ee hawshooda oo ahaa qashin qaadka garoonka ay soo gabagabeeyeen.

Marwo Sacaada Cansharaar oo iyagu usbuucan ka timi magaalada Borama ayaa iyana soo bandhigtey waxyaabihii ay kusoo aragtey Borama oo ay ugu horeyso mashruuca qashin qaadka garoonka, Cusbitaalka Borama, Xaalada Jeelka Borama iyo arimo kale oo aan iyadoo fidiyo ah daawadayaasha usoo bandhigi doono.
Maxamed Huseen Sayre oo ka mida aqoonyahanada reer Awdal ee kulankan ka hadashay ayaa isaguna tibaaxay ahmiyada wadashaqaynta iyo midnimadu leedahay waxana uu sheegay in Jaaliyada Seattle ay soo mareen marxalado kala duwan ayna yihiin kuw marwalba diyaar u ah door laxaadlehna ka qaata hawlaha horumarinta gobolka Awdal. Maxamed Huseen Sayre ayaa sheegay in dhawaan kulankan ururka ARDAA uu yeelan doono ahmiyada kowaadi ay noqon doonto sidii loo dardar galin lahaa la iskuna dubo ridi lahaa meela la iskugu keeni lahaa hawlaha qabyada ah ee gobolka Awdal sida Garoonka, Dariiqa iyo hawlaha kale oo loo eegi doono hadba sida ay u kala ahmiyad badan yihiin la iskana kaashan doono sidii loo dhamaystiri lahaa hawlkasta.
Macadka Islaamiga ah ee saylac ayaa maanta noqday mashruuca ugu baahi badan ee mudan in gargaar degdega lala gaadho madaama la sheegay in macadka ay soo food saartey dakhli yari dhinaca maaliyada ah oo sababtey in dhismaha kirada macadku ka furan yahay la iska rabo mudo gaaban gudaheed. Sidoo kale waxa la sheegay in si dhibaatada kirada macadka looga baxo maamulka macadka Saylac uu ku talo jiro in dhul loo iibiyo laga dhisi doono dhisme Macadka Islaamiga Saylac ee degamada Borama uu yeesho mustaqbalka dhaw.
Gabagabadii kulanka ayaa waxa saylac.com  isku dubo riday inay kaydiso magacaanta dhamaan Jaaliyada Awdal ee degan Seattle si mustaqabla ay u dhib yaraato isu imaad lagaga tashado hawlaha taagan .

Qaar ka mida kasoo qaybgalayaashii kulanka :

1) Maxamuud Cabdilahi Rooble
2) Mawliid Magare
3) Maxamed Xuseen Sayre
4) Maxamuud Cabdilahi (Qaame)
5) Yusuf Cabdi (Cabdilugweyne)
6) Abdi Barkhadle
7) Muse Dugsiiye
8 Asad H. Micaad
9)Wacays Qaasim
10) Maxamed Axmed Maxamuud
11) Khalid Maxamed
12) Axmed A. Imaan
13) Abdi Gireh
14) Xalimo Khalif
15) Xasna Qasim
16) Casha Muuse
17) Maxamed Qasim Nuur
18) Sacaada Hadi
19)  Wacays Barkhad
20) Cibaado Cali Xasan
21) Deeqa Cisman
22) Saciid Axmed Maxamuud
23) Basra Yusuf Cilmi
24) Maxamuud Barkhad Cabdilahi
25) Abdirisak Roble

>>halkan ka dhegayso barnaamij ay bishii sagaalaad ee sanadkii inaga tagay saylac.com ka diyaariysey mahadka Islaamiga ah ee Saylac.

Iyo xubno kale oo aad u tiro badan iskuguna jira bulshada nuucyadeeda kala duwan. Kulankan ayaa waxa uu ku dhamaaday farxad iyo raynrayn, isku duubni iyo wada tashi kawsaday islaa markaana lagu balamay in kulamo nuucan ah ay si joogta ah loo qaban doono mustaqbalka dhaw si loo dardar galiyo mashaariicda horumarineed ee gobolada Awdal iyo Salal.
Maxamuud Cabdilahi Rooble
Saylac.com
Seattle USA
Email : saylacnews@yahoo.com       >>halkan ka dhegayso barnaamij ay bishii sagaalaad ee sanadkii inaga tagay saylac.com ka diyaariysey mahadka Islaamiga ah ee Saylac.